ថ្ងៃទី១៩ ខែកុម្ភៈ ឆ្នាំ២០២២ ក្រុមការងារមជ្ឈមណ្ឌលឯកសារខេត្តតាកែវ បានដឹកនាំសិស្សចំនួន១៦នាក់ (ប្រុស៨នាក់ និស្រី៨នាក់) មកពីសាលាវិទ្យាល័យជាស៊ីមតាកែវ មកទស្សនកិច្ចពិព័រណ៍រូបថតទាក់ទងនឹងប្រវត្តិសាស្រ្តខ្មែរក្រហម និងទស្សនាការចាក់បញ្ចាំងវីឌីអូដែលនិយាយអំពីអ្នកស្ម័គ្រចិត្តកម្ពុជានៅខេត្តកំពង់ចាម។
បន្ទាប់ពី សិស្សានុសិស្សទស្សនាការតាំងពិព័រណ៍និងការចាក់បញ្ចាំងវីឌីអូរួច ក៏បន្តចូលរួមវេទិកាថ្នាក់រៀនស្ដីពី «ប្រវត្តិសាស្រ្តកម្ពុជាប្រជាធិបតេយ្យ(១៩៧៥-១៩៧៩)»។ វេទិកាថ្នាក់រៀននេះ ត្រូវបានរៀបចំឡើងក្នុងគោលបំណងដើម្បីលើកកម្ពស់ការយល់ដឹងអំពីប្រវត្តិសាស្រ្តកម្ពុជា ប្រជាធិបតេយ្យ (១៩៧៥-១៩៧៩)។
នៅក្នុងកម្មវិធីវេទិកាថ្នាក់រៀនប្រវត្តិសាស្រ្តកម្ពុជាប្រជាធិបតេយ្យ ក្រុមការងាររបស់មជ្ឈមណ្ឌលឯកសារខេត្តតាកែវ បានយកចិត្តទុកដាក់ក្នុងការទប់ស្កាត់ទប់ស្កាត់ការឆ្លងរាលដាលពីជំងឺកូវីដ-១៩ បំលែងថ្មីប្រភេទ «អូមីក្រុង» ដោយគោរពនូវវិធានការថែរក្សាសុខភាពតាមរយៈវិធានការបីកុំនិងបីការពាររបស់ក្រសួងសុខាភិបាល។ ក្រុមការងារមជ្ឈមណ្ឌលឯកសារខេត្តតាកែវ បានធ្វើការបាញ់ទឹកអាល់កុលសម្អាតដៃទៅដល់សិស្សានុសិស្ស ការរក្សាគម្លាត និងការពាក់ម៉ាស់ ។
បន្ទាប់ពីការអនុវត្តនូវវិធានការការពាររួចមក ក្រុមការងាររបស់មជ្ឈមណ្ឌលឯកសារខេត្តតាកែវ បានចែកជូនក្រដាសស្ទាបស្ទង់ចំណេះដឹងមុនការចាប់ផ្ដើមវេទិកាថ្នាក់រៀន ចំនួន១៦ច្បាប់ទៅកាន់ក្រុមកូនសិស្សដើម្បីបំពេញ។ បន្ទាប់ពី សិស្សបំពេញតារាងស្ទាបស្ទង់មតិរួច វាគ្មិនក៏ចាប់ផ្តើមបង្រៀននៅប្រវត្តិសាស្រ្តកម្ពុជាប្រជាធិបតេយ្យទៅកាន់សិស្ស។ សិស្សទាំងអស់មានពេលវេលាគ្រប់គ្រាន់ ក្នុងការសិក្សាស្វែងយល់កាន់តែច្បាស់ទៅលើអំពើប្រល័យពូជសាសន៍ ដែលបានកើតឡើងជាង៤០ឆ្នាំមុននៅក្នុងប្រទេសកម្ពុជា ដែលមានប្រជាជនប្រមាណជិតពីរលាននាក់ បានស្លាប់បាត់បង់ជីវិតដោយសារការសម្លាប់ ការអត់ឃ្លាន និងការធ្វើទារុណកម្ម។ សំណួរពាក់ព័ន្ធនឹងប្រធានបទនេះត្រូវបានចោទសួរដោយក្រុមកូនសិស្សនៅក្នុងវេទិកាថ្នាក់រៀនជាច្រើនដូចជា៖ ១, មានកត្តាអ្វីខ្លះដែលធ្វើឲ្យ ប៉ុលពត សម្លាប់ខ្មែរគ្នាឯង? ២, តើខ្មែរក្រហមយកផលដំណាំដែលធ្វើបានទៅណា? ៣, ក្នុងចំណោមមេដឹកនាំខ្មែរក្រហមទាំងអស់ ហេតុអ្វីមានតែ ឌុច ដែលចូលខ្លួនសារភាពពីទោសកំហុសដែលខ្លួនបានប្រព្រឹត្តក្នុងរបបខ្មែរក្រហម? ៤, ហេតុអ្វីមេដឹកនាំមានចំណេះដឹងពីក្រៅប្រទេស មិនយកមកអភិវឌ្ឍន៍ប្រទេស បែជាអនុវត្តការដឹកនាំបែបប្រល័យពូជសាសន៍ទៅវិញ? ៥, ហេតុអ្វីបានជាប្រជាជនដាំដំណាំហើយ បែជាហូបមិនបាន? ៦, ហេតុអ្វីនៅក្នុងសម័យខ្មែរក្រហមគ្មានការអភិវឌ្ឃន៍? ៧, តើមូលហេតុអ្វី បានជាកើតមានរបបខ្មែរក្រហម? និង៨, ហេតុអ្វីបានសម្ដេច នរោត្ដម សីហនុ គាំទ្រខ្មែរក្រហមទាំងដឹងថាប្រកាន់យករបបកុម្មុយនីស្ត?
ដើម្បីឆ្លើយតបនូវសំណួរជាច្រើនដែលក្រុមកូនសិស្សបានចោទសួរ វាគ្មិនបានឆ្លើយសំណួរដោយការប្រើប្រាស់វិធីសាស្រ្ត ផ្ដោតទៅលើជំពូកផ្សេងៗគ្នា តាមរយៈការចាក់បញ្ចាំងមេរៀននៅក្នុងស្លាយ ជាគោល «ប្រវត្តិសាស្រ្តកម្ពុជាប្រជាធិបតេយ្យ(១៩៧៥-១៩៧៩)» និងការពន្យល់មេរៀនបន្ទាប់ពីបញ្ចប់វេទិកាក្នុងថ្នាក់រៀន។
ម្យ៉ាងទៀត តាមរយៈការទស្សនាពិព័រណ៍, វីដេអូខ្លីស្តីពីសកម្មភាពរបស់អ្នកចិត្តកម្ពុជាខេត្តកំពង់ចាម, រូបភាព, ឯកសារផ្សេងៗនៅក្នុងមជ្ឈមណ្ឌលឯកសារខេត្តតាកែវ និងការរៀបរាប់អំពីដំណើរការ «ប្រវត្តិសាស្រ្តកម្ពុជាប្រជាធិបតេយ្យ(១៩៧៥-១៩៧៩)» យ៉ាងក្បោះក្បាយរបស់វាគ្មិន គឺកាន់តែបង្កើននូវការចងចាំទាក់ទងរបបកម្ពុជាប្រជាធិបតេយ្យដល់សិស្សបានយល់កាន់តែច្បាស់។
រូបភាព និងមេរៀន «ប្រវត្តិសាស្រ្តកម្ពុជាប្រជាធិបតេយ្យ(១៩៧៥-១៩៧៩)» ទាំងនេះបានពណ៌នាដោយចេតនានៃភាពស្អប់ខ្ពើម និងការរើសអើងដែលឈានទៅដល់ការបំផ្លិចបំផ្លាញស្ទើរទាំងស្រុងទៅលើក្រុមជនជាតិ ជាតិពិន្ធុ ពូជសាសន៍ ឬក្រុមសាសនាដទៃផ្សេងទៀត ដោយមានការប្រកាន់និន្នាការនិយមលាបពណ៌។ ចេតនានៃអំពើឃោរឃៅទាំងនេះហាក់បានឆ្លុះបញ្ចាំង និងដាស់តឿនដល់ក្រុមកូនសិស្សឲ្យរៀនសូត្រពីរឿងរ៉ាវ ដែលសង្គមរបស់ខ្លួនបានឆ្លងកាត់ ហើយងាកមករកសាមគ្គីភាព និងរស់នៅដោយចេះទទួលស្គាល់នូវភាពសម្បូរបែបរបស់មនុស្សជាតិនៅក្នុងសង្គម។ ទាំងនេះគឺជាគោលដៅដែលជំរុញឲ្យមានការបង្កើតសកម្មភាពនៃការបណ្ដុះគំនិតក្នុងការធានាបានថា បទពិសោធន៍ដ៏ជូរចត់របស់សង្គមកម្ពុជា និងមិនវិលត្រឡប់សារជាថ្មីម្ដងទៀតទេ។
បន្ទាប់ពី បញ្ចប់វេទិកាថ្នាក់រៀននេះមានការចែកក្រដាសស្ទាបស្ទង់មតិដល់សិស្សបំពេញសារជាថ្មីម្តងទៀត ដើម្បីវាស់ស្ទង់អំពីការយល់ដឹងរបស់សិស្សទាក់ទងប្រវត្តិសាស្រ្តកម្ពុជាប្រជាធិបតេយ្យមុននិងក្រោយពេលសិក្សារួច។ ក្រុមកូនសិស្សទាំង១៦នាក់ ស្មើនឹង ១០០% (មួយរយភាគរយ) មានការកើនឡើងនូវចំណេះដឹង និងអាចយល់អំពីវិធីសាស្រ្តទប់ស្កាត់អំពើប្រល័យពូជសាសន៍ ដែលពិតជាមានសារសំខាន់សម្រាប់បុគ្គល, សហគមន៍, និងសង្គមជាតិទៅថ្ងៃក្រោយ។
ក្រោយពីបានចូលរួមក្នុងវេទិកាថ្នាក់រៀននេះរួចមានសិស្សម្នាក់បានបង្ហាញអំពីចំណាប់អារម្មណ៍ និងការយល់ឃើញរបស់ខ្លួនដូចខាងក្រោម៖
“ខ្ញុំឈ្មោះ ហ៊ុន ឧសភា ភេទប្រុស អាយុ១៨ឆ្នាំ ជាសិស្សនៃវិទ្យាល័យ ជាស៊ីម តាកែវ។ តាមរយៈការចូលរួមវេទិការថ្នាក់រៀនស្តីអំពីប្រវត្តិសាស្រ្តកម្ពុជាប្រជាធិបតេយ្យនេះ ខ្ញុំបានទទួលចំណេះដឹងច្រើនអំពីប្រវត្តិសាស្រ្តខ្មែរក្រហម ដែលជាបទពិសោធន៍និងជាមេរៀនដ៏សំខាន់សម្រាប់រូបខ្ញុំនិងអ្នកជំនាន់ក្រោយនៅក្នុងការអភិវឌ្ឍប្រទេសជាតិទៅថ្ងៃខាងមុខ ដើម្បីបញ្ជៀសឲ្យផុតពីរបបប្រល័យពូជសាសន៍និងសម្លាប់រង្គាលនេះមិនឲ្យកើតឡើងម្តងទៀត។
អត្ថបទ ៖ ង៉ាន់ វីន អ្នកស្ម័គ្រចិត្តកម្ពុជាខេត្តតាកែវ
