នៅវេលាម៉ោង៦:៤៥នាទីព្រឹក ថ្ងៃអាទិត្យទី៦ ខែកក្កដា ឆ្នាំ២០២៥ ហោអដ្ឋិធាតុ ឬ បណ្ណាល័យធាតុ នៅវត្តលង្កា ដែលផ្តួចផ្តើមសាងសង់ដោយមជ្ឈមណ្ឌលឯកសារកម្ពុជា និងមានការគាំទ្រពីសម្តេចព្រះធម្មលិខិតបណ្ឌិត សៅរ៍ ចាន់ថុល្ល និងគណៈកម្មការគ្រប់គ្រងវត្តលង្កា បានប្រគល់អដ្ឋិធាតុឈ្មោះ ពៅ ចាន្ធី ជូនលោក សំរិត ចណ្ណារ័ត្ន ត្រូវជាស្វាមី និងលោក សំរិត សុមនោ ត្រូវជាកូនប្រុស ព្រមទាំងសមាជិកក្រុមគ្រួសារនិងចៅស្រីនៃអដ្ឋិធាតុមួយចំនួនទៀត ដើម្បីរៀបចំធ្វើបុណ្យ និងយកទៅតម្កល់ទុកក្នុងចេតិយ នៅវត្តស្រុកកំណើតរបស់ខ្លួន។
កោដ្ឋដាក់អដ្ឋិធាតុលេខ៤០៥ មានឈ្មោះ ពៅ ចាន្ធី ភេទស្រី បានស្លាប់នៅថ្ងៃទី១២ ខែធ្នូ ឆ្នាំ១៩៩២ ដោយជំងឺមហារីក។ លោកស្រី ពៅ ចាន្ធី (អដ្ឋិធាតុលេខ៤០៥ ក្នុងបញ្ជីអដ្ឋិធាតុ) មានស្រុកកំណើត ក្នុងស្រុកកំពង់ត្របែក ខេត្តព្រៃវែង។
ស្វាមីរបស់អដ្ឋិធាតុលេខ៤០៥ មានឈ្មោះ សំរិត ចណ្ណារ័ត្ន អាយុ៦០ឆ្នាំ ស្រុកកំណើត ឃុំកោះអន្លង់ចិន ក្រុងតាខ្មៅ ខេត្តកណ្តាល។ ក្រោយបានរៀបអាពាហ៍ពិពាហ៍ជាមួយភរិយាឈ្មោះ ពៅ ចាន្ធី លោកសំរិត ចណ្ណារ័ត្ន ទទួលបានកូនប្រុសម្នាក់ឈ្មោះ សំរិត សុមនោ ដែលជាកូនទោលក្នុងគ្រួសារ។ សព្វថ្ងៃនេះ សំរិត សុមនោ មានភរិយានិងមានកូនស្រីពីរនាក់ ហើយរស់នៅក្នុងសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ។
ថ្មីៗនេះ ក្រោយបានប្រកាសព័ត៌មានជាសាធារណតាមបណ្តាញសារព័ត៌មានជាតិ និងអន្តរជាតិ នៅក្នុងថ្ងៃទិវាជាតិនៃការចងចាំ “អំពើឧក្រិដ្ឋកម្មប្រល័យពូជសាសន៍ ក្នុងរបបខ្មែរក្រហម” នាថ្ងៃទី២០ ខែឧសភា ឆ្នាំ២០២៥ លោក សំរិត សុមនោ ដែលជាកូនប្រុសរបស់អដ្ឋិធាតុឈ្មោះ ពៅ ចាន្ធី បានស្នើសុំអនុញ្ញាតចូលមកស្វែងរកអដ្ឋិធាតុនៃមនុស្សជាទីស្រឡាញ់របស់ខ្លួន នៅក្នុងហោអដ្ឋិធាតុ ដែលមជ្ឈមណ្ឌលឯកសារកម្ពុជាបានរៀបចំបង្តើតឡើងនៅក្នុងវត្តលង្កា ព្រះកុសមារាម។
កាលពីថ្ងៃទី២៥ ខែឧសភា ឆ្នាំ២០២៥ លោក សំរិត សុមនោ ជាកូនប្រុសរបស់អដ្ឋិធាតុលេខ៤០៥ បានមកស្វែងរកអដ្ឋិធាតុរបស់ម្តាយឈ្មោះ ពៅ ចាន្ធី តាមរយៈការផ្ទៀងផ្ទាត់ឈ្មោះក្នុងបញ្ជីលេខរៀងនិងឈ្មោះនៃអដ្ឋិធាតុទាំង៤៦៤នាក់ នៅក្នុងហោអដ្ឋិធាតុ នៃវត្តលង្កា ព្រះកុសមារាម។
គួររំឭកផងដែរថា ក្នុងឆ្នាំ២០១៥ មជ្ឈមណ្ឌលឯកសារកម្ពុជា បានប្រមែប្រមូលរក្សាទុកនូវអដ្ឋិធាតុជនរងគ្រោះកម្ពុជាចំនួន៤៦៤នាក់ ដែលបានស្លាប់ក្នុងសង្គ្រាមនៃទសវត្សរ៍ឆ្នាំ១៩៧០, ១៩៨០, និង១៩៩០ ដែលអដ្ឋិធាតុទាំងអស់នេះមិនឃើញមានសាច់ញាតិមកប្រមូលយកទៅថែរក្សាទុក ហើយស្ថិតនៅរាយប៉ាយក្នុងបរិវណវត្តលង្កា ព្រះកុសមារាម នៃរាជធានីភ្នំពេញ។ អដ្ឋិធាតុជនរងគ្រោះកម្ពុជាទាំង៤៦៤នាក់នេះ ត្រូវបានមជ្ឈមណ្ឌលឯកសារកម្ពុជា ប្រមូលមករក្សាទុកនៅក្នុងហោអដ្ឋិធាតុដែលមានទីតាំងស្ថិតក្នុងវត្តលង្កា ព្រះកុសមារាម សម្រាប់គោលបំណងដ៏សំខាន់មួយ គឺដាក់បំរើជូនដល់សាធារណជនទូទៅដើម្បីការស្វែងរកការបាត់ខ្លួននៃមនុស្សជាទីស្រឡាញ់របស់ខ្លួន (ការស្វែងរកសមាជិកគ្រួសារដែលបានបាត់ខ្លួន) និងដើម្បីឧទ្ទិសដល់វិញ្ញណក្ខន្តនៃអដ្ឋិធាតុជនរងគ្រោះទាំងអស់ទៅតាមពីធីបុណ្យប្រពៃណីនៃព្រះពុទ្ធសាសនា។
រស់ សំពៅ ៖ ប្រធានបណ្ណាល័យហ្លួងម៉ែនៃមជ្ឈមណ្ឌលឯកសារកម្ពុជា
រូបថត ៖ បណ្ណសារមជ្ឈមណ្ឌលឯកសារកម្ពុជា
